मुक्तदीहरुको लागि अनिवार्य वा मुस्तहब कार्यहरु

१) अनस (रजि.) को भनाई अनुसार अल्लाहका रसूल (स.) “अल्लाहु अकबर” भन्नु भन्दा पहिले हाम्रो तर्फ फर्केर भन्नुहुन्थ्यो “मिल र सीधा होऊ ।” (बुखारी र मुस्लिम)

२) नुअ्मान बिन बशीर (रजि.) को भनाई अनुसार अल्लाहका रसूल (स.) हाम्रा सफहरुलाई यसरी सीधा गर्नुहुन्थ्यो मानौं उहाँ (स.) तीरलाई सीधा गरिरहनु भएको छ र यसो तबसम्म गर्नुहुन्थ्यो जब उहाँ (स.) लाई ज्ञात हुन्थ्यो कि हामीले बुझिसक्यौं । एकदिन उहाँ (स.) बाहिर आउनु भयो (नमाज पढाउन) र नमाजको लागि उभिनुभयो । अल्लाहु अक्बर भन्नु भन्दा पहिले उहाँ (स.) ले एक जनाको छातिलाई सफभन्दा अगाडि आएको देख्नुभयो । उहाँ (स.) ले भन्नुभयो “हे अल्लाहका भक्तहरु हो ! आफ्ना सफहरुलाई सीधा राख अन्यथा अल्लाहले तिमीहरुको बीचमा असहमति उत्पन्न गरिदिने छन् ।” (मुस्लिम, अबू दाऊद, तिर्मिजी, नसई, इब्ने माजा)

३) अबू उमामा (रजि.) को भनाई अनुसार अल्लाहका रसूल (स.) ले भन्नुभयो, “आफ्ना सफहरुलाई सीधा राख । आफ्ना काँधहरुलाई समान राख । आफ्ना (मुस्लिम) भाईहरुको लागि नम्रता अपनाऊ । सफमा रहेको खाली ठाउँलाई भर किनभने शैतान तिमीहरुको बीच (खाली ठाउँ) मा भेडाको बच्चाको जस्तो प्रवेश गर्छ ।” (अह्मद, तबरानी) 

४) अनस (रजि.) को भनाई अनुसार अल्लाहका रसूल (स.) ले भन्नुभयो, “अगाडिको सफलाई पुरा गर अनि त्यसपछि रहेको सफलाई यसरी नै पूरा गर र जे कमि हुन्छ त्यो अन्तिम सफमा होस् ।” (अबू दाऊद, नसई, बैहकी)

५) अबु हुरैरह (रजि.) को भनाई अनुसार अल्लाहका रसूल (स.) ले भन्नुभयो, “इमाम बनाउनुको अर्थ उसको आज्ञापालन गर्नु हो । तसर्थ तिमीहरु इमाम भन्दा पहिले नगर । उसले अल्लाहु अक्बर भनेपछि तिमीहरु पनि अल्लाहु अक्बर भन । उसले रुकू गरे पछि तिमीहरु पनि रुकू गर । उसले ‘समिअल्लाहु लिमन् हमीदह्’ भने पछि तिमीहरु ‘अल्लाहुम्म रब्बना लकल् हम्द’ भन । उसले सज्दा गरेपछि तिमीहरु सज्दा गर र उसले रुकू नगरेसम्म तिमीहरु रुकू नगर र उसले सज्दा नगरेसम्म तिमीहरु सज्दा नगर ।” (अह्मद, अबू दाऊद)

६) अबू हुरैरह (रजि.) को भनाई अनुसार अल्लाहका रसूल (स.) ले भन्नुभयो, “तिमीहरु मध्ये कसैले ईमामले भन्दा पहिले (रुकु र सज्दाबाट) टाउको उठाइएको खण्डमा अल्लाह तआलाले उसको अनुहार गधा जस्तै बनाइदिनेछन् । तर उसको स्वरुप गधा सरह बनाइदिनेछन् भन्ने कुराबाट उसलाई भय लाग्दैन । (बुखारी, मुस्लिम, अबू दाऊद, अह्मद, तिर्मिजी, नसई, इब्ने माजा)

७) अनस (रजि.) को भनाई अनुसारा अल्लाहका रसूल (स.) ले भन्नुभयो, “हे मानिसहरु हो ! म तिमीहरुको इमाम हुँ, तसर्थ तिमीहरु मभन्दा पहिले न रुकु गर, न सज्दा गर, न बस र न सलाम फेर ।” (अह्मद, मुस्लिम)

८) बरा बिन आजिब (रजि.) को भनाई छ, “हामीहरु  अल्लाहका रसूल (स.) को पछाडि नमाज पढ्ने गथ्र्यौं । उहाँ (स.) ले ‘समिअल्लाहु लिमन् हमिदह्’ भनेपछि हामीमध्येबाट कोही पनि त्यतिन्जेलसम्म सज्दाको लागि आफ्नो ढाडलाई झुकाउँदैनथ्यो जबसम्म उहाँ (स.) भुईमा आफ्नो निधार राख्नुहुन्नथ्यो ।” (बुखारी, मुस्लिम, अबू दाऊद, तिर्मिजी, अह्मद, इब्ने माजा, नसई)

९) अबू हुरैरह (रजि.) को भनाई अनुसार अल्लाहका रसूल (स.) ले भन्नुभयो “के तिमीहरु नमाज पढिसकेपछि अगाडि वा पछाडि या दाहिने वा देब्रेतिर सर्न सक्दैनौ ?” (अह्मद, अबू दाऊद, इब्ने माजा)

१०) अनस (रजि.) को भनाई अनुसार अल्लाहका रसूल (स.) ले उनीहरुलाई नमाजको लागि प्रोत्साहित गर्नुभयो । र उहाँ (स.) ले (सलाम फेरे पछि दाहिने वा देब्रे तिर) फर्कनु भन्दा पहिले आफ्नो ठाउँबाट हट्न मनाही गर्नुभयो । (अबू दाऊद)