**इह्रामको शाब्दिक अर्थ कुनै यस्तो अवस्थामा (चिजमा) प्रवेश गर्नु हो जसले मानिसमाथि केही कामहरुलाई अबैध बनाइदिन्छ जुन त्यस भन्दा पहिले उसको लागि वैध थिए । यसको पारिभाषिक अर्थ अनुसार हज वा उम्रहको अवस्थामा प्रवेश गर्नु (अर्थात तिनको नियत गर्नु) हो । (अल्–मिस्बाह अल्– मुनीर आदि)
#गुस्ल
१) आइशा (रजि.) को भनाई अनुसार अल्लाहका रसूल (स.) इह्राम बाँध्ने नियत गर्दा खनमी (बेरीका पातहरु जस्तै एउटा चिज) र उश्नान (एक प्रकारको बास्नादार चिज जुन चिलाउने रोगको उपचारको लागि प्रयोग हुन्छ) ले आफ्नो टाउको धुनु हुन्थ्यो र त्यसमा अलिकति तेल लगाउनु हुन्थ्यो । (अह्मद र दार कुत्नी)
२) जैद बिन साबित (रजि.) को भनाई अनुसार अल्लाहका रसूल (स.) ले इह्रामको लागि गुस्ल गर्नुभयो । (तिर्मिजी)
३) जाबिर (रजि.) द्वारा उल्लेखित हदीस पहिले नै उल्लेख गरिसकिएको छ जस अनुसार अबू बक्र सिद्दीक (रजि.) की पत्नी अस्मा बिन्त उमैस (रजि.) को छोरा मुहम्मद बिन अबी बक्र (रजि.) को जन्म भयो । उनले अल्लाहका रसूल (स.) कहाँ सन्देश पठाइन् र सोधिन् “अब के गर्ने ?” उहाँ (स.) ले उनलाई जवाफ पठाउनु भयो “गुस्ल गर र रगत आउने ठाउँमा लुगा राखेर इह्राम बाँध ।” (मुस्लिम, अहमद, अबू दाऊद, इब्ने माजा, नसई, आदि)
#सुगन्धित हुनु
४) आइशा (रजि.) भन्छिन् “मानौ म अहिले पनि अल्लाहका रसूल (स.) टाउकोमा सुगन्धको चमक देखिरहेकी छु जबकि उहाँ (स.) इह्रामको अवस्थामा हुनुहुन्थ्यो । (बुखारी, मुस्लिम, अह्मद, आदि)
५) आइशा (रजि.) कै भनाई छ “म इह्रामको लागि अल्लाहका रसूल (स.) को शरीरमा उहाँ (स.) ले इह्राम बाँध्नु अगाडि नै सुगन्ध लगाइदिने गर्थें । यसरी नै म उहाँ (स.) ले कअ्बाको तवाफ (तवाफे इफादा) गर्नुभन्दा पहिले इह्राम खोलेपछि पनि उहाँ (स.) को शरिरमा सुगन्ध लगाउने गर्थें ।” (बुखारी र मुस्लिम)
६) आइशा (रजि.) ले नै उल्लेख गरेको तेस्रो हदीस अनुसार अल्लाहका रसूल (स.) जब इह्रामको नियत गर्नु हुन्थ्यो तब उहाँ (स.) सँग जुन सबैभन्दा राम्रो अत्तर हुन्थ्यो, उहाँ (स.) त्यही प्रयोग गर्नुहुन्थ्यो यतिसम्मकि म तेलको चमक इह्रामको अवस्थामा पनि उहाँ (स.) को टाउको र ढारीमा देख्थें । (बुखारी र मुस्लिम)
७) यअ्ला बिन उमैया (रजि.) को भनाई छ, “हामी अल्लाहका रसूल (स.) समक्ष उपस्थित भएका थियौं । त्यसबेला उहाँ (स.) “जअराना” मा उपस्थित हुनुहुन्थ्यो र एकजना आयो । उसले जुब्बा (एक प्रकारको पहिरन जसले काँध देखि तल खुट्टासम्म छोपेको हुन्छ) लगाएको थियो । त्यसमा केशरको धब्बा लागेको थियो । उसले अल्लाहका रसूल (स.) सँग सोध्यो “तपाईको आदेश के छ म आफ्नो उम्रह कसरी गरुं ?” उहाँ (स.) ले भन्नु भयो “आफ्नो जुब्बा फुकाल र आफूमाथि लागेको केसरको धब्बालाई धोएर सफा गर र आफ्नो उमरह त्यसरी नै गर जसरी तिमी आफ्नो हज गर्छौ ।” (बुखारी, मुस्लिम, अह्मद)
#इह्रामको कपडा सेतो हुनु
८) इब्ने अब्बास (रजि.) को भनाई अनुसार अल्लाहका रसूल (स्.) ले भन्नुभयो “तिमीहरुका (पुरुषहरुका) कपडा सबै भन्दा उत्तम सेतो रङ्गका हुन् । तसर्थ तिमीहरुमध्ये जीवितहरु पनि सेतो रङ्गगका कपडा लगाऊ र तिमीहरुका मृतकहरुलाई पनि सेतो रङ्गको कफन लगाऊ ।” (बैहकी, आदि)
#दुई रकअत नमाज
९) अब्दुल्लाह बिन उमर (रजि.) को भनाई अनुसार अल्लाहका रसूल (स.) ले जुल् हलीफामा दुई रकअत नमाज पढ्नु भयो र जब उहाँ (स.) को सवारी उभियो तब उहाँ (स.) ले तल्बिया भन्नु भयो । (बुखारी र मुस्लिम आदि)
टिप्पणियाँ