इह्रामको अवस्थामा गर्न नहुने कामहरू

१) कअ्ब बिन अज्रह (रजि.) को भनाई छ, अल्लाहका रसूल (स.) ले मलाई भन्नुभयो “सायद तिमीहरूलाई जुम्राहरुले हैरान पारिरहेका छन् ।” मैले भनें “हजूर, हे अल्लाहका रसूल” । उहाँ (स.) ले भन्नुभयो “त्यसो भए तिमीहरु मुण्डन गराऊ र (फिद्याको हिसाबले) तीन दिनको रोजा राख वा ६ जना अभाव ग्रस्तलाई खाना खुवाऊ वा एउटी बाख्रीको कुर्बानी गर ।” (बुखारी, मुस्लिम, आदि)

२) अब्दुल्लाह बिन उमर (रजि.) को भनाई अनुसार अल्लाहका रसुल (स.) ले भन्नुभयो “जो इह्रामको अवस्थामा छ ऊ न कमिज लगाओस्, न फेटा बेरोस् न बुर्नुस् (एक प्रकारको जुब्बा जसमा बर्स अर्थत एक प्रकारको सुगन्ध वा केसर लागेको होस् न मोजा प्रयोग गरोस् तर यदि उसले जुत्ता भेटाएन जुन “कअ्ब” (गोलीगाँठो¬¬) मुनिसम्म मात्र हुन्छ भने ऊ मोजा नै प्रयोग गर्न सक्छ जबकि ऊ त्यसलाई गोली गाँठोको मुनिसम्म काटोस् ।” (बुखारी, मुस्लिम, अबू दाऊद, तिर्मिजी, नसई, इब्ने माजा, अह्मद आदि)

३) अब्दुल्लाह बिन उमर (रजि.) द्वारा उल्लेखित माथिको हदीसको एउटा अर्को हदीसमा यी शब्दहरू बढी प्रयोग भएका छन् “इह्रामको अवस्थामा महिलाले अनुहारमा नकाब नलगाउने र पन्जा प्रयोग नगर्ने ।” (बुखारी, नसई, तिर्मिजी, अह्मद)

४) आइशा (रजि.) को भनाई छ, “सवारी चढेका पुरुषहरु हाम्रो अगाडिबाट जान्थे र हामी अल्लाहका रसूल (स.) सँग इह्रामको अवस्थामा हुन्थ्यौं । जब मानिसहरु हाम्रो नजिक आउँथे हामी टाउकोबाट अनुहारमा पर्दा गथ्र्यौं । (अबू दाऊद, इब्ने माजा)

५) इब्ने अब्बास (रजि.) र जाबिर (रजि.) द्वारा उल्लेखित हदीस अनुसार अल्लाहका रसूल (स.) ले भन्नुभयो “जो व्यक्ति नाईटो देखि तलसम्म छोप्ने लुगा पाउँदैन ऊ मोजा प्रयोग गरोस् ।” (बुखारी र मुस्लिम आदि)

६) उस्मान (रजि.) को भनाई अनुसार अल्लाहका रसूल (स.) ले भन्नुभयो “कोही इह्रामको अवस्थामा छ भने उसले निकाह नगरोस्, निकाह नगराओस् र निकाहको सन्देश नपठाओस् ।” (मुस्लिम, अह्मद, अबू दाऊद, तिर्मिजी नसई, इब्ने माजा, आदि)

७) अल्लाहका रसूल (स.) ले मुक्त गर्नुभएको दास अबू शफिअ् (रजि.) को वर्णन अनुसार “अल्लाहका रसूल (स.) ले मैमून (रजि.) सँग इह्राममा नभएको अवस्थामा निकाह गर्नुभयो र इह्राममा नभएको अवस्थामा नै उनीसित एकान्त अपनाउनु भयो र मैले नै दुबैजनाको बीचमा सन्देश आदान प्रदान गर्ने काम गरें । (अह्मद, तिर्मिजी, बैहकी)

८) सुलह् हुदैबिया (हुदैबियाको सन्धि) को अवसरमा जब अल्लाहका रसूल (स.) मदीना मुनव्वराबाट हिँड्नु भयो तब उहाँ (स.) ले र अधिकतम सम्मानित सहाबीहरु (रजि.) ले इह्राम बाँधे । एकजना सहाबी अबू कतादा (रजि.) थिए, उनले इह्राम बाँधेनन् किनकि अल्लाहका रसूल (स.) लाई यो सूचना प्राप्त थियो कि सम्भवतः बाटोमा शत्रुले आक्रमण गर्नेछन् । तसर्थ उहाँ (स.) ले अबू कतादा (रजि.) र केही अन्य सहाबीहरु (रजि.) लाई इह्राम बिना नै रहन दिनुभयो ताकि उनीहरु शत्रुको ठेगाना थाहा पाइराखुन् । अबू कतादा (रजि.) को नै भनाई छ, “मैले बाटोमा एउटा जिराफ देखें । म ऊतिर बढें, उसलाई भाला हानें गाडिदिएँ । मैले मानिसहरुसँग (अर्थात ती सहाबीहरु (रजि.) सित जो इह्रामको अवस्थामा थिए) मद्दत माँगे तर उनीहरुले मेरो मद्दत गर्न अस्वीकार गरे ।

यसै हदीसको अन्तिममा उल्लेख भए अनुसार अल्लाहका रसूल (स.) ले सम्मानित सहाबीहरु (रजि.) लाई सोध्नुभयो, “के तिमीहरु मध्ये कसैले यसलाई (अर्थात अबू कतादा (रजि.) लाई) जनावरमाथि हमला गर्नको लागि भनेका थियौ वा जनावर तिर इसारा गरेका थियौ ?” सहाबीहरु (रजि.) ले जवाफ दिए “थिएन” । (बुखारी र मुस्लिम, आदि)

९) जाबीर (रजि.) को भनाई अनुसार अल्लाहका रसूल (स.) ले भन्नुभयो “इह्रामको अवस्थामा तिमीहरुको लागि जमीनको सिकार (सिकार गरिएको जनावरबाट खानु) जायज छ। (जबकि त्यो सिकार तिमीले स्वयं नगरेको होस् वा तिमीहरुको लागि नगरिएको होस्)” । (अबू दाऊद, तिर्मिजी, नसई, इब्ने माजा, आदि)

१०) जाबिर बिन अब्दुल्लाह (रजि.) को भनाई अनुसार अल्लाहका रसूल (स.) ले भन्नुभयो “जसले इह्रामको अवस्थामा सिकार गऱ्यो उसको जिम्मामा एउटा भेंडाको कुर्बानी अनिवार्य हुन्छ । (अबू दाऊद, तिर्मिजी, नसई, इब्ने माजा, बैहकी, हाकिम, इब्ने हिब्बान)

११) यजीद बिन नईम अस्लमी (रह.) (एक जना ताबई) को भनाई अनुसार जजाम समुदायको एकजना व्यक्तिले आफ्नी पत्नीसँग शारीरिक संपर्क राख्यो जबकी उनीहरू दुबैजना इह्रामको अवस्थामा थिए । त्यस व्यक्तिले अल्लाहका रसूल (स.) समक्ष उपस्थित भएर समस्याको विषयमा सोध्यो । उहाँ (स.) ले भन्नुभयो “तिमीहरू दुबैजना हजका रीति पूरा गर र कुर्बानी गर अनि तिमीहरू दुबैजना फर्केर जाऊ । जब तिमी त्यस ठाउँमा पुग्छौ जहाँ तिमीहरूले काम गरेका थियौ तब एक अर्काबाट छुट्टिऊ । (यस प्रकार कि) तिमीहरू एक अर्कालाई देख्न सक्दैनौ तिमीहरू दुबैको जिम्मामा एक एक वटा हज छ । (कुनै वर्ष) तिमीहरु दुबै जना आऊ र जब त्यस ठाउँमा पुग्छौ जहाँ तिमीहरूले त्यो काम गरेका थियौं । तब इह्राम बाँध र आफ्ना हजका रीति पूरा गर र कुर्बानी गर ।” (बैहकी)